Մեր առաջին տարրը. Կովկասյան ջուր.

Տարածաշրջանի լուսանկարիչները “պատմում են” ջրի մասին

Ամփոփվել են Վայրի բնության և մշակութային արժեքների պահպանման հիմնադրամի կողմից դեռևս 2009 թվականի հոկտեմբերին` “Արևորդի” երկրորդ միջազգային բնապահպանական փառատոնի շրջանակներում Հոլանդիայի Պրինց Քլաուսի անվան մշակույթի և զարգացման հիմնադրամի աջակցությամբ մեկնարկած  “Մեր առաջին տարրը. Կովկասյան ջուր ” խորագրով տարածաշրջանային լուսանկարչական մրցույթի արդյունքները:

Ի սկզբանե մրցույթի նպատակն  էր լուսանկարչության միջոցով  հասարակության ուշադրությունը սևեռել ջրի խնդիրներին, բարձրացնել իրազեկությունը Կովկասյան տարածաշրջանում և հնարավորություն ընձեռել հանրությանը` ծանոթանալու մեր առաջին տարրի  զարմանահրաշ գեղեցկությանը:

Թե պրոֆեսիոնալ, թե սիրող լուսանկարիչներ Հայաստանից, Վրաստանից, Թուրքիայից, Իրանի Իսլամական Հանրապետությունից ներկայացրին ջրի թեմայով իրենց լուսանկարները: Յուրաքանչյուր մասնակցի հնարավորություն ընձեռնվեց ներկայացնելու մինչև չորս աշխատանք ներառող լուսանկարների շարք:

Մրցույթի ժյուրիի կազմում ոլորտի պրոֆեսիոնալներ հրավիրվեցին տարածաշրջանի հինգ երկրներից` Սերգեյ Փարաջանովի անվան տուն-թանգարանի տնօրեն, լուսանկարիչ Զավեն Սարգսյանը, Բաթումիի Արտ Հաուս կինոփառատոնի տնօրեն, ռեժիսոր Գեորգի Գոգիբերիձեն, Թուրքիշմուն Ֆիլմ Յապինի տնօրեն, ռեժիսոր Այդին Քուդուն, ՀՀ-ում Իրանի Իսլամական Հանրապետության դեսպանության մշակույթի խորհրդական Մոհամմադ Շաքիբան և ադրբեջանցի լրագրող Վաֆա Ֆարաջովան:

Մասնակիցների լուսանկարչական աշխատանքների գնահատումն  ընթացավ հետևյալ սկզբունքներով.

• Մրցույթն իրականացվեց երկու առանձնացված բաժիններում` պրոֆեսիոնալ և սիրողական:
• Աշխատանքները գնահատվեցին տեխնիկական և գեղարվեստական տեսանկյուններից, ինչպես նաև հաշվի առնվեց դրանց համապատասխանությունը մրցույթի խորագրին:
• Գնահատումն իրականացվեց 1-10 սանդղակով` 1-ը համարելով նվազագույն և 10-ը` առավելագույն գնահատական:

Յուրաքանչյուր լուսանկարչի համար հաշվարկելով ժյուրիի կազմի բոլոր անդամների կողմից դրված գնահատականների միջինը` ստացվեցին մրցույթի հետևյալ արդյունքները.  

 

Պրոֆեսիոնալ բաժնում գլխավոր մրցանակ` Սուրեն Մանվելյան /Հայաստան/ /դրամական պարգևը` 500 ԱՄՆ դոլար/

Պրոֆեսիոնալ բաժնում ժյուրիի հատուկ մրցանակ` Սերկան Թայկան /Թուրքիա/ /դրամական պարգևը` 300 ԱՄՆ դոլար/

Սիրողական բաժնում գլխավոր մրցանակ` Արմինե Խաչատուրյան /Հայաստան//դրամական պարգևը` 200 ԱՄՆ դոլար/

Սիրողական բաժնում խրախուսական մրցանակ` Էդգար Մարուքյան /Հայաստան/, /դրամական պարգևը` 100 ԱՄՆ դոլար/

Որպես ինքնատիպ մրցույթի խորհրդանշական շարունակություն` Վայրի բնության և մշակութային արժեքների պահպանման հիմնադրամը հրատարակության է պատրաստում “Մեր Առաջին տարրը” խորագրով լուսանկարչական գիրք, որտեղ ոչ միայն կներառվի մրցույթին մասնակցած լուսանկարների ընտրանին, այլև կզետեղվեն Կովկասյան տարածաշրջանի ջրին նվիրված բանաստեղծություններ և առասպելներ:

Հիմնադրամը նաև ծրագրում է իրականացնել մրցույթում հաղթած լուսանկարների ցուցադրությունների շարք Կովկասյան տարածաշրջանի երկրներում:     

---