Օգոստոսի 5-ից մինչեւ օգոստոսի 15-ը Ծաղկաձորում կայանալիք «Արեւորդի» ամառային ճամբարին կմասնակցեն մոտ 80 պատանի բնապահպաններ Հայաստանի բոլոր մարզերից եւ Ղարաբաղից:

«Արեւորդի» ամառային ճամբարը կազմակերպվում է ամեն տարի ՀՀ Վայրի բնության և մշակութային արժեքների պահպանման հիմնադրամի կողմից «Արեւորդի» էկո-ակումբների սաների համար՟ Հայաստանի առաջատար բջջային օպերատոր «ՎիվաՍել-ՄՏՍ» ընկերության զգալի աջակցությամբ: Ուրախությամբ տեղեկացնում ենք նաեւ, որ այս տարի առաջին անգամ «Արեւորդի» ամառային ճամբարի անցկացմանն աջակցում է նաեւ GTZ-ը:

Ճամբարը կդառնա էկո-ակումբների 10-15 տարեկան սաների հավաքատեղի, որտեղ պատանիները կամփոոփեն տարվա ընթացքում ստացած գիտելիքները եւ կպատրաստվեն նոր ուսումնական տարվան՟ լրացուցիչ ինտենսիվ դասընթացների մասնակցելով: Մասնավորապես, այս տարի ամառային ճամբարում երեխաները ընդհանուր գիտելիքներ կստանան կենսաբազմազանության, հատկապես՟ Ծաղկաձորի կենսաբազմազանության մասին: Բացի այդ, նրանք կսովորեն տնօրինել պինդ կենցաղային թափոնները, արեւային էներգիան կուտակող գործիք պատրաստել, արշավների գնալ, կծանոթանան էկո-տուրիզմի զարգացման հեռանկարնենրին, ազգային պարեր կպարեն, նաեւ կներգրավվեն բազմաթիվ այլ կրթական ու բնապահպանական միջոցառումներում: Լրագրության եւ լուսանկարչության ու նկարահանման դասընթացների օգնությամբ կբացահայտվեն Ծաղկաձորի բնապահպանական խնդիրները, որոնք կարտացոլվեն բացառապես ճամբարի մասնակիցների ուժերով պատրաստված ֆիլմում:

Ամառային ճամբարի ավարտին երեխաները կներկայացնեն իրենց տասնօրյա աշխատանքի արդյունքները բնապահպանական ցուցահանդեսում, որը  կկազմակերպվի Ծաղկաձորի Գրողների տանը: Ցուցահանդեսի այցելուները հնարավորություն կստանան տեսնել խցիկներում ներկայացված պատանի բնապահպանների աշխատանքը: Երեխաները խցիկներում կցուցադրեն թղթի վերամշակման գործընթացը, կփորձարկեն արեւային էներգիան կուտակող գործիքը եւ կցուցադրեն իրենց նկարահանած ֆիլմը:

Հայաստանի տարբեր քաղաքներից եւ գյուղերից ժամանած այս «արեւորդիներին» կմիավորեն բնությունը եւ նրա անհետացման վտանգը: Նրանք համատեղ ուժերով կօգնեն պաշտպանել մեզ շրջապատող այն լավն ու բարին, որը կարող է վաղն անհետ կորչել մարդու գործունեության արդյունքում: